ئایا هتلەر ناچار نویسەریگ ئەڵمانی کردیە کتاوەگەی خوەی بخوەێد؟
شەفەق نیوز/ کەسەیلیگ لەبان سۆشیال میدیا، یە چەن ساڵیگە، باس ئەوە کەن ک ئادۆڵف هیتلەر لە ساڵ ١٩٣٣ ناچار نویسەر ئەڵمانی ئێرنست تولور کردیە لاپەڕەیل کتاوەگە قۊت بەێد ک دژوە نازی نویساسە، تا مردنی.
باوجی ئی باسە شیوەیگتر دیرێد، ک ئێرنست تولەر لە ئەمریکا خوەی وە سێدارە کوشت. ئەو پۆستەیلە لەبان سۆشیال میدیا، وینەی هتلەر وەگەردی نریاگە، ونویسیایە، هتلەر ناچار ئێرنست تولەر نویسەر کرد کتاویگ دژوە نازی وە ٤٧٠ لاپەڕە بخوەێد، و هەر لەلی خوارد تا مرد.
ئەو پۆستە لەماوەی چەن ساڵ گوزەشتە، هەزاران شێر لە چەن ماڵپەڕیگ ئەرای کریا، باوجی ئەو قسە راس نییە.
ئێرنست تولەر کیە؟ ئێرنست تولەر نویسەر ئەڵمانی لە ساڵ ١٨٩٣ لە پۆڵەندا لەداڵگ بوی، ونویسەریگ شانۆ وشاعر و چالاکوان سیاسی مارکسی بوی، وکارەیلی ئەرا دەیان زوان لە جەهان ئەڵگەردان کریا.
خوەنەواری زانکۆ لە فەرنسا تەواو کرد، و لە ساڵ ١٩١٤ رەسیە ئەڵمانیا تا بچوودە ناو سوپا، باوجی دویای نزیکەی ساڵیگ سوپا هیشتەجی تا بزووتنەوەیگ ئەرا ئاشتی لە شار هایدلبورگ ئەڵمانیا دامەزرنێد، ئیجا وەرەو میونیخ وای، تا لەورا بایکۆتیگ کراکاری دروس بکەێد، ولەورا دەسگیر کریا.
پەنج ساڵ زیندانی لەبان تولەر دەرچگ، لەناو ئەو پەنج ساڵە، ناودارترین کتاوەیلی نویسان، و لە ساڵ ١٩١٩ بویە سەرۆک دەسەی ناوەندی کۆمار باڤاریای سۆڤیەتی.
لە ساڵ ١٩٣٣ خوەی رەسانە ئەمریکا.
کتاوەیل تولەر لەو کتاوەیلە بوین ک نازیەیل فرمان سزیانیان دان، چوینکە دژوە نازی قسە کەن.
تولەر لە سەرەتای یادوەری میژوو خوەی وت: لەو رووژە ک کتاوەیلی لە ئەڵمانیا سزانن لە ١٠ی مایۆ ١٩٣٣ ئەو کتاوە نویسانیە.
تولەر چوین مرد؟ لە ٢٢ مایۆ ساڵ ١٩٣٩، تولەر لەناو ژووریگ لە هوتێلیگ لە نیویۆرک، لە تەمەن ٤٥ ساڵان، وە سێدارە کوتایی وەژیان خوەی هاورد.
